E kīa ana, he wāhi rangahau te whare wānanga, engari, kāore e waiho ana anake taua mahi mā ngā ahorangi, mā ngā pūkenga, mā ngā ākonga paerunga rānei. Uru ai hoki ngā ākonga paeraro ki roto i ēnei momo mahi. I tēnei hēmeta e toru ngā mahi rangahau i mahi ai ā mātou tauira reo Māori o te Whare Wānanga o Ōtākou.
I mahia ngātahitia te “Kāinga Waewae” e ngā tauira o ngā karaehe reo, arā, he rōpū nō ngā tāngata o MAOR112 Te Kākano, te MAOR212 Te Pihinga, me te MAOR312 Te Māhuri. I tēnei tau ka rangahaua ngā mahi a ngā tini tari o te Kete Aronui (Humanities). He momo whakaaturanga tā tēnā rōpū, tā tēnā rōpū mō te tari i rangahau ai rātou.
Ko Haeata rātou ko Dane ko Rodney e waiata ana mō te Tari Whakamātau Hinekaro (Psychology)
Ko tēnei te tau tuatahi i tū ai te pepa MAOR206/306 Ngā Pūkenga Tuhi, arā he kōhi hei whakapakari i ngā pūkenga, i ngā āheitanga e pā ana ki ngā momo tuhituhinga. Tokowhā ngā kaimahi o Te Tumu i whakaako i te pepa nei. Ko te tuhituhi ā-whare wānanga tētahi o ngā kaupapa, kia reri ai ngā tauira mehemea ka tahuri rātou ki te tuhi i ā rātou rangahau o ngā tohu paerunga i roto i te reo Māori. Mō tēnei pepa, ka hangaia e rātou he pānuitanga ānō nei kei tētahi hui rangahau rātou.
Ka riro i a Lyric Bird (taha mauī) te paraihe mō te pai o te whakapaipai o tāna pānuitanga e pā ana ki te tāmoko; ka whiwhi a Orini Herewini-Macdougall (taha matau) ki te paraihe mō te pai o te rangahau, mō te hunga “ahi matao”, arā, mō te hunga kāore e uru ana ki ngā mahi a ō rātou marae.
I tēnei wiki hoki ka tū te konohete a ngā tauira o MAOR308 Ngā Hākinakina a te Māori, ko Kelly Ann Tahitahi te kaiako, ā, ko Karyn Paringātai te kaiwhakahaere. Nā ngā tauira ngā waiata i rangahau, i tito, i whakarite; ko te “Reaka Z” te kaupapa, arā, ko te whakatipuranga e ako ana ki te whare wānanga ināianei. Tokomaha ngā tāngata i tae mai ki te mātakitaki, ki te whakarongo ki ngā waiata mō ngā āhuatanga o te ao hurihuri o tēnei wā.
Ko ngā tauira o MAOR308 (Ngā Hākinakina a te Māori) e waiata ana.
